خاتمہ بالخیر کی ۱۵ نشانیاں

۱۔  جس  کا  آخری  کلام  لا  اله  الا  الله  (محمد  رسول  الله)  ہوگا  وہ  جنت  میں  جائے  گا۔

(ابو  داود،  کتاب  الجنائز،  باب  فی  التلقین،  حدیث  ۳۱۱۶)

۲۔  جس  نے  اخلاص  کے  ساتھ  اللہ  کے  وحدہ  لاشریک  لہ  ہونے  کا  عقیدہ  رکھتے  ہوئے  دنیا  چھوڑی،  نماز  قائم  کی  اور  زکوٰۃ  ادا  کی  تو  وہ  اس  حال  میں  مرے  گا  کہ  اللہ  اس  سے  راضی  ہوگا۔

(ابن  ماجہ،  کتاب  السنۃ،  باب  فی  الایمان،  حدیث  ۷۰)

۳۔  جو  مسلمان  جمعہ  کے  دن  یا  جمعہ  کی  رات  میں  مرے  گا،  اللہ  تعالی  اسے  فتنۂ  قبر  سے  بچالے  گا۔

(ترمذی،  أبواب  الجنائز،  باب  ماجاء  فیمن  يموت  یوم  الجمعۃ،  حدیث  ۱۰۷۶)

۴۔  جو  اللہ  کی  راہ  میں  مارا  جائے  وہ  شہید  ہے  اور  جو  اللہ  عزوجل  کی  راہ  میں  مر  جائے  وہ  شہید  ہے۔

(مسلم،  کتاب  الامارۃ،  باب  بیان  الشہداء،  حدیث  ۱۹۱۴)

۵۔  شہدا  پانچ  ہیں:  (۱)  طاعون  میں  مبتلا  ہوکر  مرنے  والا  (۲)  پیٹ  کی  بیماری  کے  سبب  مرنے  والا  (۳)  سمندر  میں  ڈوب  کر  مرنے  والا  (۴)  ملبے  تلے  دب  کر  مرنے  والا  (۵)  اللہ  کی  راہ  میں  قتل  کیا  جانے  والا۔

(بخاری،  کتاب  الجہاد،  باب  الشھادۃ  سبع  سوی  القتل،  حدیث  ۲۸۲۹)

                                       

۶۔  جو  حاملہ  یا  نفاس  والی  عورت  مر  جائے  وہ  شہید  ہے،  اس  کا  بچہ  اسے  اپنی  کٹی  ہوئی  نال  سے  کھینچتے  ہوئے  جنت  میں  لے  جائے  گا۔

(مسند  احمد،  حدیث  راشد  بن  حبیش،  حدیث  ۱۵۹۹۸)

۷۔  جو  اپنا  مال  بچانے  میں  مارا  جائے  وہ  شہید،  جو  اپنا  دین  بچانے  میں  مارا  جائے  وہ  شہید  پے،  جو  اپنی  جان  بچانے  میں  مارا  جائے  وہ  شہید  ہے۔

(ترمذی،  کتاب  الدیات،  باب  ماجاء  فیمن  قتل  دون  مالہ  الخ،  حدیث  ۱۴۲۱)

۸۔  جو  اسلامی  سرحدوں  کی  حفاظت  کرتے  ہوئے  مر  جائے  تو  جو  نیک  عمل  کرتا  تھا،  لکھا  جاتا  رہے  گا  اور  اس  کا  رزق  برابر  جاری  رہے  گا  اور  فتنۂ  قبر  سے  محفوظ  رہے  گا۔

(مسلم،  کتاب  الامارۃ،  باب  فضل  الرباط  فی  سبیل  اللہ،  حدیث  ۱۹۱۳)

۹۔  جو  عورت  اس  حال  میں  فوت  ہوئی  کہ  اس  کا  شوہر  اس  سے  راضی  تھا،  تو  وہ  جنت  میں  داخل  ہوگی۔

(ترمذی،  کتاب  الرضاع،  باب  فی  حق  الزوج،  حدیث  ۱۱۶۴)

۱۰۔  جو  مدینہ  میں  مرنے  کی  استطاعت  رکھتا  ہو  وہ  مدینہ  میں  ہی  مرے  کیونکہ  جو  مدینہ  میں  مرے  گا  میں  قیامت  کے  دن  اس  کی  شفاعت  کرونگا  اور  اس  کے  حق  میں  گواہی  دوں  گا۔

(شعب  الایمان،  باب  فی  المناسک  فضل  الحج  و  العمرۃ،  حدیث  ۴۱۸۲)

۱۱۔  جو  شخص  دوحرموں  (یعنی  مدینہ  منورہ  اور  مکہ  معظمہ)  میں  سے  کسی  ایک  میں  مرے  گا  قیامت  کے  دن  امن  والوں  میں  اٹھایا  جائے  گا۔

(شعب  الایمان،  باب  فی  المناسک  فضل  الحج  و  العمرۃ،  حدیث  ۴۱۵۸)

۱۲۔  جو  حج  یا  عمرے  کے  لیے  نکلا  اور  مر  گیا  اس  کی  پیشی  نہ  ہوگی،  نہ  ہی  حساب  ہوگا  اور  اس  سے  کہا  جائے  گا  کہ  جنت  میں  داخل  ہو  جا۔

(المعجم  الأوسط،  باب  المیم،  حدیث  ۵۳۸۸)

۱۳۔  جو  روزے  کی  حالت  میں  مَرا  ،  اللہ  تعالی  قیامت  تک  کے  لیے  اس  کے  حساب  میں  روزے  لکھ  دے  گا۔

(الفردوس  بمأثور  الخطاب،  باب  الميم،  حدیث  ۵۵۵۷)

                                     

۱۴۔  جسے  رمضان  میں  موت  آئی  وہ  جنت  میں  داخل  ہوگا،  جو  عرفہ  کے  دن  انتقال  کر  گیا  وہ  جنت  میں  داخل  ہوگا  اور  جسے  صدقہ  دیتے  ہوئے  موت  آئی  وہ  بھی  جنت  میں  جائے  گا۔

(حلیة  الاولیاء،  طلحة  بن  مصرف،  حدیث  ۶۱۸۷)

۱۵۔  مومن  کی  موت  پیشانی  پر  پسینے  کے  ساتھ  ہوتی  ہے۔

(سنن  النسائی،  کتاب  الجنائز،  باب  علامۃ  موت  المؤمن،  حدیث  ۱۸۲۸)